Benvido ao blog da Biblioteca Castelao onde esperamos compartir contigo experiencias arredor da lectura.
Aproveitando as visitas das familias para a realización dos obradoiros puxemos á súa disposición libros descatalogados, revistas e xornais doutros anos para que puideran levalos e darlles unha nova vida nas súas casas. Así foron os nosos "libros libres".
O día 10 de decembro, cada grupo do cole tivo que comentar un dereito e colorealo. Despois, na "hora de ler", todo o alumnado de EP e EI xuntámonos na zona de buses agrupándonos en círculos concéntricos e pasámonos un fío ata convertinos nunha gran tea de araña. Esta tea simboliza a seguridade para vivir unha vida o máis xusta posible que nos proporciona a Declaración Universal dos Dereitos Humanos, todos e todas colaboramos para formar a nosa propia rede de apoio. Esta actividade foi proposta polo 3º ciclo (5º e 6º de EP)
Durante a semana do 24 ao 28 de novembro, o alumnado de 4º da ESO recibiu no centro a varios especialistas sobre cuestións relacionadas con diferentes ámbitos da represión franquista no século pasado. Estas charlas están enmarcadas dentro do seu proxecto de trimestre para a materia de Xeografía e Historia, titulado “Voces silenciadas. Lugares de memoria. Violencia e represión nos concellos de Monfero, Irixoa, Aranga e Vilarmaior entre 1936 e 1949”.
O primeiro en asistir foi o arqueólogo Serxio Castro, da Asociación para a Recuperación da Memoria Histórica, quen lles fixo unha exposición sobre o proceso de exhumación dunha fosa común. O alumnado puido compartir con el ata tres sesións de 50 minutos nas que foron descubrindo diversas curiosidades de arqueoloxía forense e tamén se interesaron por saber como poderían facer eles como particulares para iniciar a solicitude de exhumación dos restos que teñen localizados a través de diversas entrevistas orais aos veciños do Concello de Aranga.
O venres 28, ás 12:35, acudiron á biblioteca o ilustrador Carlos Sardiña, o xornalista Pablo Santiago, a profesora e investigadora Anxos García Fonte e o historiador Enrique Sanfiz para presentar o libro titulado A morte nas Fragas, que narra a historia de represión de Pedro Rico e Constantino López, veciños da parroquia de Taboada, en Monfero. Visualizaron o documental e puideron observar en directo a creación artística de dous impresionantes debuxos feitos a carbón de Carlos Sardiña. Posteriormente, compartiron con Pablo Santiago unha charla sobre o seu traballo explicándolles diversos acontecementos e sucesos que están aínda a investigar.
Por último, á tarde, de 15:35 a 17:30 h tiveron unha dinámica para traballar a oratoria de cara á próxima presentación do seu traballo con Oladapo Oladipo, profesor do Colexio Internacional de Eirís, que lles deu as claves para realizar unha exposición oral controlando os nervios, os tempos e as emocións.
Polo 25 N o alumnado do 2º ciclo de EP (3º e 4º) estivo investigando o traballo das lavandeiras. Tamén visitaron no Museo das Mariñas a exposición de Xoana Abraira, "o oficio de lavar". Así foi crearon unha pequena instalación artística onde tenderon roupa para facerlle homenaxe a este traballo tan duro que facían normalmente as mulleres. Nas camisetas e panos brancos debuxaron e escribiron consignas contra a violencia de xénero.
Aquí tedes o resultado:
O Día Internacional dos Dereitos da Infancia conmemorouse no noso centro cunha actividade moi especial e enriquecedora: un Contacontos en galego protagonizado polo alumnado de 1º de ESO e dirixido aos nenos e nenas de Infantil e Primaria.
O obxectivo desta xornada foi lembrar a todos que os nenos e
nenas de todo o mundo "teñen dereito a vivir felices, protexidos e
respectados".
A Rebelión de Contos
A peza central da actividade
foi o conto "Lola e a rebelión dos contos". A través desta
historia, a pequena Lola descobre que personaxes clásicos como Cincenta,
Carapuchiña ou Hansel e Gretel están "cansos de sufrir sempre nas súas
historias" e decidiron rebelarse.
Os personaxes esixían os
mesmos dereitos que as nenas e nenos reais:
A narración serviu para
reflexionar sobre como os contos axudan a entender mellor os Dereitos da
Infancia, como o dereito á igualdade, á educación, á protección, á saúde ou ao
xogo e a paz.
Música e Lembranzas
Ademais da contada, a
xornada contou coa canción dos dereitos creada para a ocasión, cuxa
mensaxe principal é:
"""Os
dereitos da infancia non se escriben na area, porque os leva o vento cando sobe
a marea...""
A intención era que eses
dereitos quedasen gravados nos corazóns de todos.
Ao remate da actividade, os
máis pequenos foron obsequiados cuns marcapáxinas nos que se
representaban todos os dereitos, feitos con agarimo polo alumnado de 4º de ESO.
A xornada uniuse "a
maxia dos contos coa forza dos dereitos" , conseguindo que o propio
alumnado de 1º de ESO actuase como un elemento dinamizador e fomentando a súa
creatividade e participación. Foi, sen dúbida, unha xornada moi enriquecedora.
Aqui tedes pendurado o conto, a canción e unha reportaxe gráfica da xornada.
CONTO
CANCIÓN "OS NOSOS DEREITOS"
.jpeg)
Todos aqueles alumnos/as da ESO que colaboraron na celebración do Samaín reuníronse hoxe venres 14 na biblioteca escolar para recoller un pequeno agasallo e diploma en agradecemento á súa axuda e compromiso. Grazas a estes mozos e mozas levamos a cabo un aprendizaxe en cascada, axudando aos máis pequenos nas diferentes estacións de xogos, realizando lecturas e tamén ensinando aos máis pequenos nos diferentes obradoiros como o de baile ou de stop motion.
Cartel Día Internacional del Libro Ilustración Azul de bibliotecacpivirxedacela
Polo Samaín a biblioteca púxose a escuras e así lemos e contamos contos: os da ESO a 5º e 6º de EP cos seus microrrelatos, os maiores aos pequenos e as familias tamén tiveron o seu momento pola tarde. Fixemos exposición de títulos e tamén de casas encantadas baseándonos na novela de Agustín Fernández Paz "Cartas de Inverno". Non faltaron os medos reais, eses que saen todos os días nos xornais...
Os libros guían moitas das actividades dos ambientes de 1º, 2º e 3º de EP.
O alumnado de 5º e 6º comezou a súa andanza como colaboradores e colaboradoras da biblio.
O alumnado de 3º de EP traballou con este libro de Marie G. Rohde para coñecer algúns perigos que nos acechan e que son reais relacionados cos problemas ecosociais e como facerlles fronte.
Os libros saen da biblioteca para instalarse no patio de Educación Infantil e de Primaria.
Os "exploradores de Monfero" de 6º de EI, convertéronse en auténticos locutores de radio! Nesta ocasión gravaron un podcast sobre adiviñas e refráns típicos do Samaín, traballando non só a comprensión e a lectura, senón tamén a ecxpresión oral, a escoita activa e o respecto polas quedas da fala.
Ademais aprenderon a seguir un pequeno guión, a falar diante dun micrófono e a colaborar en equipo, desenvolvendo así habilidades comunicativas e creativas moi importantes.
Foi unha experiencia chea de risas, aprendizaxe e moita ilusión.
Este venres día 7 de novembro ás 15:30 horas temos unha cita na biblioteca, comezará a andar o club de lectura de adultas. Elexiremos libro, poñeremos data para a seguinte quedada e algunha sorpresiña máis!
Nos recreos de EP e coa axuda dos colaboradores durante esta semana vide á nosa biblio a escoitar o conto de "Unha pantasma con asma" e facer o seguinte experimento de pantasmas voadoras!
Polo Día das Bibliotecas entregamos premios aos máis lectores de EP e ESO e dende o Dto. de Lingua e Literatura Galega, Laura, achéganos este vídeo sobre as bibliotecas máis emblemáticas do mundo.
Feliz día a todas as persoas usuarias!
.jpeg)
.jpeg){kind=link}