Este ano 2020 conmemórase o centenario do nacemento de Isaac
Díaz Pardo e Alento Esbravexo convoca un concurso onde cadaquén pode inspirarse
en algo relacionado coa figura de Isaac Díaz Pardo (un acontecemento concreto
da súa vida, un debuxo, unha pintura, unha tipografía, un cartaz, unha peza
cerámica, etc.), tamén se poderá inspirar na súa escola (empresas que formou,
artistas discípulos de Isaac,...) ou mesmo se pode facer algo totalmente novo,
xa for reinterpretando calquera destes eidos artístico-vitais indicados e crear
un debuxo, unha pintura, un tipo de letra, un deseño, grafiti, xoia, danza,
música, etc. con total liberdade.
O prazo de presentación das obras remata o 13 de agosto de
2020.
XEOGRAFÍAS LECTORAS NA BIBLIOTECA
ESCOLAR é o lema que A Consellería de Cultura, Educación e Universidade publica
para as bibliotecas escolares de Galicia de cara a este curso 2020/2021ª. Este
lema querepoñer o foco nas
posibilidades que ofrece a biblioteca escolar para a construción da persoa
lectora a través das distintas actividades que programa e dos recursos que pon
a disposición da comunidade educativa.
A ilustradora encargada este ano
de interpretar o lema elixido foi Bea Lema, quen nos ofrece unha imaxe
evocadora deses mundos imaxinarios que a lectura pode axudar a visitar e construír.
En tempos confusos como os que estamos a vivir cómpre volver
ás orixes, ao fundamental: a lectura e toda a súa potencialidade, sen esquecer
outras oportunidades da biblioteca escolar para unha formación integral do
alumnado. Atravesar o mapa da lectura pode facerse desde distintas ópticas,
comezar a viaxe desde distintos portos:
- Pescudar nas lecturas que convidan a viaxar, a explorar, a
investigar. Lecturas que nos permiten chegar lonxe sen movernos da escola (ou
da casa). Lecturas que axudan a incentivar o inconformismo, a necesidade de
coñecer outros mundos, de ampliar a nosa visión, de "ler o mundo".
- Configurar o itinerariolector como punto de partida da nosa xeografía lectora.
- Debuxar o mapa das nosas curiosidades, exploracións e
descubrimentos a través das lecturas.Descubrir as relacións entre identidade e lectura.
- Observar o modo en que cambiou a nosa xeografía lectora
durante o período de confinamento (os nosos hábitos, as nosas lecturas...).
- Saber que somos os nosos propios cartógrafos, os que
organizamos o noso espazo lector (e o noso "liberespazo", o sistema
de lecturas que imos creando ao longo da vida).
- Observar o noso corpo como un mapa de coñecemento,
achegarnos á práctica da lectura a través do propio corpo. Descubir a
capacidade reparadora da lectura.
- Deixarse levar polas relacións entre cartografía e
literatura,que convidan á aventura
(debuxar espazos peritextuais, con mapas e planos que crean expectativas e
acompañan na aventura lectora, debuxar mapas que representan mundos coñecidos e
mundos imaxinarios, relacionar as nosas lecturas a través de
"constelacións literarias", en función da temática, os
personaxes...).
XEOGRAFÍAS LECTORAS NA BIBLIOTECA ESCOLAR convida a explorar
todas as posibilidades da lectura: en calquera soporte, en calquera formato,
con calquera finalidade; lecturas textuais e icónicas; imaxes fixas e en
movemento; lectura de gráficos, planos, mapas ou infografías; lecturas
individuais e lecturas compartidas, en silencio ou en voz alta; lectura de
ficción e de información; lectura libre e guiada; lectura que nos axude a comprender
mellor o noso mundo e lectura que nos axude a entender o mundo dos outros...
Bea Lema ilustradora do lema deste curso "Xeografías
lectoras na biblioteca escolar" nos fala neste vídeo do seu interese polas
imaxes que transmiten unha idea de forma sintética, os ilustradores que a
inspiran, o proceso de documentación, as probas, a técnica ...