Bibliografía "Tirando do Fío"

Tirando do fío: bibliografía de bibliotecacpivirxedacela

Recomendacións lectoras de Nadal

RECOMENDACIÓNS DE NADAL 2025 de bibliotecacpivirxedacela

Libros libres

 Aproveitando as visitas das familias para a realización dos obradoiros puxemos á súa disposición libros descatalogados, revistas e xornais doutros anos para que puideran levalos e darlles unha nova vida nas súas casas. Así foron os nosos "libros libres".

10 de decembro: Día dos dereitos humanos.

 O día 10 de decembro, cada grupo do cole tivo que comentar un dereito e colorealo. Despois, na "hora de ler", todo o alumnado de EP e EI xuntámonos na zona de buses agrupándonos en círculos concéntricos e pasámonos un fío ata convertinos nunha gran tea de araña. Esta tea simboliza a seguridade para vivir unha vida o máis xusta posible que nos proporciona a Declaración Universal dos Dereitos Humanos, todos e todas colaboramos para formar a nosa propia rede de apoio. Esta actividade foi proposta polo 3º ciclo (5º e 6º de EP)

Semana da "Memoria histórica" na Biblioteca Castelao

Durante a semana do 24 ao 28 de novembro, o alumnado de 4º da ESO recibiu no centro a varios especialistas sobre cuestións relacionadas con diferentes ámbitos da represión franquista no século pasado. Estas charlas están enmarcadas dentro do seu proxecto de trimestre para a materia de Xeografía e Historia, titulado “Voces silenciadas. Lugares de memoria. Violencia e represión nos concellos de Monfero, Irixoa, Aranga e Vilarmaior entre 1936 e 1949”.

O primeiro en asistir foi o arqueólogo Serxio Castro, da Asociación para a Recuperación da Memoria Histórica, quen lles fixo unha exposición sobre o proceso de exhumación dunha fosa común. O alumnado puido compartir con el ata tres sesións de 50 minutos nas que foron descubrindo diversas curiosidades de arqueoloxía forense e tamén se interesaron por saber como poderían facer eles como particulares para iniciar a solicitude de exhumación dos restos que teñen localizados a través de diversas entrevistas orais aos veciños do Concello de Aranga.

O venres 28, ás 12:35, acudiron á biblioteca o ilustrador Carlos Sardiña, o xornalista Pablo Santiago, a profesora e investigadora Anxos García Fonte e o historiador Enrique Sanfiz para presentar o libro titulado A morte nas Fragas, que narra a historia de represión de Pedro Rico e Constantino López, veciños da parroquia de Taboada, en Monfero. Visualizaron o documental e puideron observar en directo a creación artística de dous impresionantes debuxos feitos a carbón de Carlos Sardiña. Posteriormente, compartiron con Pablo Santiago unha charla sobre o seu traballo explicándolles diversos acontecementos e sucesos que están aínda a investigar.

Por último, á tarde, de 15:35 a 17:30 h tiveron unha dinámica para traballar a oratoria de cara á próxima presentación do seu traballo con Oladapo Oladipo, profesor do Colexio Internacional de Eirís, que lles deu as claves para realizar unha exposición oral controlando os nervios, os tempos e as emocións.

Xornada de xogos de mesa: A que vas xogar este Nadal?

Este martes día 9 de decembro ás 16:30 h, desde a biblioteca do centro, temos unha xornada de convivencia de xogos de mesa en familia, ofrecida pola tenda "Margarida Xoguetes" de Carral. Omayra ensinaranos algúns xogos relacionados coas matemáticas, a lingua, a atención, a memoria... e sobre todo: a diversión! Esta actividade tamén pode servir para darlles pistas a Papá Noel e RR.MM e pasar momentos divertidos e compartidos en familia estas vacacións que se aveciñan. Anotádevos no mail bibliotecacpivirxedacela@gmail.com e indicade nome e curso das persoas que ides vir para facernos unha idea dos que somos e as idades que tedes e así poder adpatar mellor os xogos que se traian. Animádevos a participar!

Xornada de xogos de mesa de bibliotecacpivirxedacela

25 N: Lavandeiras

Polo 25 N o alumnado do 2º ciclo de EP (3º e 4º) estivo investigando o traballo das lavandeiras. Tamén visitaron no Museo das Mariñas a exposición de Xoana Abraira, "o oficio de lavar".  Así foi crearon unha pequena instalación artística onde tenderon roupa para facerlle homenaxe a este traballo tan duro que facían normalmente as mulleres. Nas camisetas e panos brancos debuxaron e escribiron consignas contra a violencia de xénero. 

Aquí tedes o resultado: 

presentacion lavandeiras de ÁNGELA

OS DEREITOS DA INFANCIA, CONTADOS E CANTADOS NO COLE

 

O Día Internacional dos Dereitos da Infancia conmemorouse no noso centro cunha actividade moi especial e enriquecedora: un Contacontos en galego protagonizado polo alumnado de 1º de ESO e dirixido aos nenos e nenas de Infantil e Primaria.

O obxectivo desta xornada foi lembrar a todos que os nenos e nenas de todo o mundo "teñen dereito a vivir felices, protexidos e respectados".

A Rebelión de Contos

A peza central da actividade foi o conto "Lola e a rebelión dos contos". A través desta historia, a pequena Lola descobre que personaxes clásicos como Cincenta, Carapuchiña ou Hansel e Gretel están "cansos de sufrir sempre nas súas historias" e decidiron rebelarse.

Os personaxes esixían os mesmos dereitos que as nenas e nenos reais:

• Unha vivenda digna, como pedían os Tres Porquiños.
• Educación e familia que os coide, como soñaban Hansel e Gretel.
• Igualdade e aceptación, como desexaba Pulgarciña.
• E, sobre todo, vivir sen medo e en liberdade, como pedía Carapuchiña Vermella.

A narración serviu para reflexionar sobre como os contos axudan a entender mellor os Dereitos da Infancia, como o dereito á igualdade, á educación, á protección, á saúde ou ao xogo e a paz.

Música e Lembranzas

Ademais da contada, a xornada contou coa canción dos dereitos creada para a ocasión, cuxa mensaxe principal é:

"""Os dereitos da infancia non se escriben na area, porque os leva o vento cando sobe a marea...""

A intención era que eses dereitos quedasen gravados nos corazóns de todos.

Ao remate da actividade, os máis pequenos foron obsequiados cuns marcapáxinas nos que se representaban todos os dereitos, feitos con agarimo polo alumnado de 4º de ESO.

A xornada uniuse "a maxia dos contos coa forza dos dereitos" , conseguindo que o propio alumnado de 1º de ESO actuase como un elemento dinamizador e fomentando a súa creatividade e participación. Foi, sen dúbida, unha xornada moi enriquecedora.

Aqui tedes pendurado o conto, a canción e unha reportaxe gráfica da xornada.

CONTO

CANCIÓN "OS NOSOS DEREITOS"

t